Jærgårds - Sambåndet

Den kristne familie- og ungdomsfestivalen Jærgårds på Klepp vert arrangert trass i koronarestriksjonar og svenske artistar som har trekt seg.

Festivalen vert i år arrangert for tredje gong på Kleppeloen i Rogaland. Datoen er 22. august. Årets versjon har vore spesielt utfordrande å planlegga, fortel arrangørane i ei pressemelding. Det er Skjærgårds Live Jærgårds, organisert som ei foreining, som står bak festivalen. Dei samarbeider med Klepp kommune, lokalt næringsliv og ei brei gruppe av lokale kristne forsamlingar.

– Uvissa som har prega koronaåret 2020, har vore vanskeleg å forholda seg til. Stadige endringar, restriksjonar på publikumskapasitet og dessutan reiseråd har gitt oss mange utfordringar, fortel festivalsjef Jan-Gunnar Haraldseid, som òg er styreleiar for arrangørforeininga.

Han skriv at Jærgårds, som mange andre kulturarrangørar, har vurdert å avlysa årets festival fleire gonger.

– Men då vi såg at vi ville klara gjennomføringa økonomisk, og vi såg alle barn og unge som har stått utan kulturtilbod i heile år, så ville vi ikkje gi opp, seier han.

Ingen svenske artistar

To av trekkplastera på årets festival var dei svenske artistane Samuel Ljungblahd og LIN D. Desse konsertane blir det ikkje noko av.

– Dessverre har dei svenske artistane våre valt å trekka seg frå festivalen, på grunn av smittesituasjonen og eit uoversiktleg karantene-regime, fortel festivalsjefen.

Han legg til at dei som har kjøpt billettar til desse konsertane, vil få tilbake pengane fortløpande.

Støtte frå kyrkjelydane

Sjølv om festivalen blir noko forskjellig i år, med færre folk, mindre stands og festivalliv, lovar arrangørane like fullt fantastiske musikkopplevingar på Jærgårds.

– Med solid støtte frå kyrkjelydane i området er vi glade for å kunna presentera eit festivalopplegg som verkeleg held høg standard. Teknisk blir det ikkje kutta ned noko på årets festival, og artistane som kjem, stod på toppen av ønskelista for i år, fortel dei.

Til sambåndet.no fortel festivalsjefen at det i år blir ny aktør som skal ta seg av matsalet:

– Ungdomslaget på Kleppe bedehus vil stå for det i år, seier Jan-Gunnar Haraldseid.

På kalenderen sin har bedehuset ført opp Jærgårds som eit arrangement for «heile huset».

Vanlegvis blir det selt berre heildagsbillettar til festivalen, men i år må Jærgårds dela opp dagen i enkeltkonsertar.

Søndagsskulen, elektro og lovsong

Etter ein eigen konsert for konfirmantane i nærområdet på fredagen, startar sjølve festivaldagen med to familiemøte der Søndagsskolen bidrar med Kristin Eide og Helga Fykse – og Maskoten Gulliver kjem òg. På desse møta vil Vetle Jarandsen leia lovsongen. Han er lovsangsleiar, produsent og låtskrivar med base i Filadelfiakirken Oslo.

DJ-duoen i Jesus loves Electro (JLE) kjem frå Oslo for å spela på Jærgårds for første gong i år. Gruppa har opptredd på dei fleste største festivalane i Europa og også i Sør-Amerika dei siste åra.

– Dette blir endå eit definitivt høgdepunkt for ungdommen. Dei som har opplevd JLE tidlegare, veit kva eg snakkar om, gliser Haraldseid.

Lovsangsleiar og låtskrivar David A. Østby kjem til Jærgårds for andre gong. Han avslutta Jærgårds i 2018.

– Vi gleder oss enormt til denne avslutninga av kvelden. Eg får gåsehud av å tenka på avslutningskonserten i 2018. Ei fantastisk oppleving, rett og slett, mimrar festivalsjefen. KPK

Både festivalsjefen og kultursjefen i kommunen trur ein ny kristen festival òg kan trekkja folk som vanlegvis ikkje er aktive i kristne samanhengar.

Familie- og ungdomsfestivalen Jærgårds, som er eit tverrkyrkjeleg prosjekt i samarbeid med Skjærgårds Live, Klepp kommune, lokalt næringsliv og kyrkjelydar i området, går av stabelen for første gong laurdag 18. august i Kleppeloen på Jæren.

Festivalsjef Jan-Gunnar Haraldseid er overraska over kor mange som har kjøpt billett på førehand.

– Vi har selt rundt 300 billettar og er veldig nøgd med pågangen. Det har vore gøy å sjå så stor mobilisering og oppslutning i dei lokale kyrkjelydane, seier han.

Haraldseid fortel at det kjem folk frå heile Rogaland til festivalen, men han er mest spent på kor stor deltakinga vert blant dei lokale innbyggjarane, særleg blant dei som ikkje er aktive i kristne samanhengar til vanleg.

– Vi er spent på kor mange, både kristne og ikkje-kristne, som dukkar opp fordi det er noko som skjer. Det er fint å ha eit tilbod i lokalmiljøet der vi på ein god måte kan visa fram kva vi trur på, seier han.

Positive lokalfolk

Jærgårdssjefen fortel at dei har fått mange positive tilbakemeldingar både frå einskildpersonar og lokale samskipnader utanfor kristenlivet.

– Tilbakemeldingane og oppslutninga rundt Jærgårds har vist at det er mange som har ei røynsle med kristen tru og er positive til det arbeidet som skjer utan at dei sjølv er aktive til vanleg, seier festivalsjefen, som håpar nokon av desse kan motiverast til å ta steget vidare inn i aktivt kristenliv.

– Vi er spent på kor mange av desse som kjem og synest det er gøy å sjå at fleire av dei allereie har bestilt billettar, seier han.

Klepp kommune har òg vore positive til satsinga. Dei har gjeve økonomisk tilskott og har hjelpt til med å gjera Kleppeloen tilgjengeleg for arrangementet.

– Vi synest det er viktig å stø opp om initiativ frå lokale innbyggjarar som vil skapa noko positivt for mange i kommunen, seier kultursjef Ulf Ludvigsen i Klepp kommune.

Han fortel at å ha ein slik festival tyder mykje for dei mange kristne innbyggjarane i kommunen, men òg andre.

– Kjernepublikummet her er sjølvsagt dei som har ei tilknyting til kyrkjer eller bedehus, men eg trur eit slikt arrangement òg kan ha ein appell for andre, seier Ludvigsen.

Har tru på å samla

Haraldseid fortel at prosessen med å få i gang Jærgårds har vore lang.

– Det er ei lita gruppe menneske og eg som har drege dette i gang og står sjølv i stor grad med den økonomiske risikoen. Vi har vore usikre og bede mykje, fortel han.

Arrangementet har mobilisert kristenfolket på Klepp på tvers av kyrkjesamfunn og tilhøyrsle.

– Vi har trua på å samla kristenfolket på tvers av forsamlingsformar. Det kan vera godt å sjå at vi er ein del folk, særleg for dei frå mindre forsamlingar, seier Haraldseid.

I tillegg til eit stort felleskor som samlar alle Soul Children kor i Rogaland, har eindagsfestivalen fått med seg lovsongsartistar som Jarle Waldemar, Impuls Stavanger, rapparane Sowdiak og GinoBless, David André Østby og det engelske bandet LZ7 .

– Vi er veldig glade for at LZ7 kjem til Jærgårds. Dei er etter mi meining det beste kristne bandet i Europa for tida. Dei spelar på dei aller største festivalane og her hos oss, seier festivalsjefen nøgd. KPK

Innlegg

Vurderte å avlysa, men det blir Jærgårds

Kommune støttar kristen festival