Framnes vil auke elevtalet

Framnes KVGS er eigd av Indremisjonssamskipnaden (IMS) og ImF sentralt. Skulen har i dag 274 elevar, noko som er rekord.

15. august fekk Utdanningsdirektoratet (Udir) søknad frå rektor Harald Voster om å få utvida det antal elevar som gir grunnlag for statstilskot, med 18. I dag er dette talet til 270.

Utvida internat

Skulen har programområda Idrettsfag og Studiespesialisering. Rektor søkjer om å få utvida med seks elevar på Idrettsfag – 96 til saman – og 12 elevar på Studiespesialisering – 192 til saman.

– Me har utvida internatet til å kunne ta imot 253 elevar. I tillegg ønskjer me å kunne ta imot elevar som bur på hybel i nærmiljøet eller heime, skriv Voster i grunngjevinga for søknaden.

Fleire vil gå på Framnes

Rektor viser til at Framnes KVGS har hatt jamn og god søknad i fleire år.

– Dei siste åra har det vore ei auke i søknadstalet til skulen, og fleire enn før takkar ja til plass. Dette fører til større konkurranse om plassane, og me stangar lettare i taket på den noverande maksimumsgrensa, peikar Voster på.

Lettare å koma inn

Samtalar med søkjarar og foreldre gir skulen inntrykk av at mange er leie seg for at ein ikkje får plass.

– Ved å auke elevtalet vil me kunne ta inn fleire elevar som no ikkje har gode nok karakterer til å koma inn. Det vil også vera lettare å unngå at me sprengjer det talet på elevar som skulen er godkjent for, skriv Harald Voster i søknaden.

Det kan ta minst eitt år før søknaden er ferdig handsama.