Det er Asia Bibis advokat Saif ul-Mulook som stadfestar overfor CNN at ho har kome seg til Canada der barna hennar har venta på henne.

Den kristne tobarnsmora vart skulda for blasfemi i 2009 og dømt til dødsstraff året etter. I oktober i fjor vart kvinna frikjent av pakistansk høgsterett, noko som førte til kraftige opptøyar i Pakistan. Ekstremistane trua både Asia Bibi og høgsterettsdommarane som frikjente henne, på livet.

Etter frikjenninga har Bibi levd under vern på fleire hemmelege adresser i Pakistan før ho no har kome seg ut av landet.

Også pakistanske tenestemenn stadfestar at Asia Bibi har forlate Pakistan.

– Asia Bibi har forlate landet. Ho er ein fri person og reiste etter eigen vilje, seier ei kjelde i Utanriksdepartementet til den pakistanske nettavisa dawn.com.

Glede og lette

Generalsekretær Ed Brown i Stefanusalliansen seier at dette er utruleg gode nyheiter.

– Asia Bibi har sete ti år i fengsel og ni år med ein dødsdom hengande over seg. Vi er utruleg glade for at ho no er ute av Pakistan. Det er også ei lette, seier Brown i ein artikkel på heimesidene til organisasjonen.

Stefanusalliansen har arbeida saman med personar og organisasjonar i Pakistan som har hjelpt Asia Bibi i fleire år.

– Saka har opptatt oss så lenge. Vi er glad for at Pakistans høgsterett stod opp for viktige rettsprinsipp og frifant henne, trass i hardt press. Vi er også glad for at Pakistans styresmakter har tatt vare på sikkerheita hennar i landet og no late henne dra, seier Brown.

Fryktar represaliar mot kristne

Generalsekretæren håper nyheita om utreisa ikkje skaper nye opptøyar.

– Det er for tidleg å seia kva konsekvensane blir for pakistanske kristne. Vi får håpa at stemninga har roa seg, og at Bibis utreise ikkje fører til represaliar mot kristne, seier Ed Brown.

Bibis advokat Saif ul-Mulook meiner protestane og dødstruslane etter Bibis frifinning ikkje er representativt for haldninga til fleirtalet av Pakistans befolkning, men har utspringet sitt i ei lita gruppe ekstremistar.

– Dei er små, men svært høglydte og valdelege. Dei kallar seg muslimar, men eg vil ikkje seia at dei er det, sa han til Kristeleg Pressekontor då han gjesta Noreg i februar. KPK

Samstundes som frigjevinga skaper glede, er det stor uro for valdelege reaksjonar mot kristne og andre religiøse minoritetar i Pakistan. Det er alt demonstrasjonar i fleire byar i landet.

Frikjend

Pakistansk høgsterett starta handsaminga av Bibi si ankesak i byrjinga av oktober. Over tre veker seinare er det klart at ho er sett fri.

Den norske organisasjonen Stefanusalliansen melder at pakistansk høgsterett frikjende Asia Bibi onsdag morgon pakistansk tid. Dei byggjer på det den pakistanske avisa dawn.com skriv, men også andre kjelder organisasjonen har i landet. Med dette er anken frå 2015 over dødsdomen mot Asia Bibi, godteken.

Asia Bibi har allereie snakka med pressa om det som har skjedd. Ifylgje telegrambyrået AFP er ho svært glad for resultatet.

– Eg kan ikkje tru det eg høyrer. Kan eg sleppe ut no? Vil dei verkeleg sleppe meg ut? Eg veit ikkje kva eg skal seie. Eg er berre så glad.

Skjerpa tryggleik

Opphevinga av domane i lågare rettsinstansar gjer at Bibi no slepp ut etter åtte år under vanskelege tilhøve i fengsel. Desse åra har mellom anna gått sterkt ut over helsa hennar.

Paradoksalt nok er situasjonen likevel at ho er meir utrygg utanfor fengselsmurane, for i det pakistanske samfunnet er det mange som er ute etter å ta saka i eigne hender og som vil drepe både henne og familien hennar.

Bibi-saka er inga småsak i det pakistanske samfunnet. Då det vart kjent tysdag kveld at høgsterett ville kome med si avgjerd onsdag, vart det sett inn strenge tryggingstiltak i hovudstaden Islamabad. Tryggleiken kring sentrale institusjonar, mellom dei høgsterettsbygninga, vart sterkt skjerpa.

Stefanusalliansen melder at det ekstreme islamske partiet Tehreek-i-Labbaik Pakistan 13. oktober kom med trugsmål om å paralysere landet dersom Asia Bibi var frikjend. Dei har óg truga dommarane i saka på livet.

På grunn av situasjonen i landet har Asia Bibis familie vore ute av Pakistan ei god stund. Det er grunn til å tru at mannen hennar, dei fem borna og mora endeleg får treffe kvarandre ein stad utanfor Pakistan om kort tid. Det blir no jobba med å få henne ut av landet.

Sjå video frå Christians in Pakistan. 

– Sanninga sigra

Asia Bibi vart skulda for blasfemi etter ein diskusjon med nokre muslimske kvinner om eit glas vatn ved ein vasspost. Etter å ha blitt klaga for blasfemi vart ho i 2010 dømd til døden.

At ho no, etter ein svært lang prosess, endeleg er fri, kan ho nesten ikkje tru sjølv, og mellom dei mange som har kjempa for henne på ulike måtar, er det stor glede.

– Dette er godt nytt. Sanninga har sigra. Bøner er blitt høyrde, og eit mirakel har funne stad. Vi takkar Gud. Rettferda sigra, seier ein glad Sajid Christopher Paul som leier organisasjonen Human Friends Organization (HFO), Stefanusalliansen sin partnarorganisasjon i Pakistan.

Sajid seier seg uroleg for tryggleiken for pakistanske kristne. Ekstreme islamistiske parti har kravd at Asia Bibi må bli hengd og også truga støttespelarane hennar og dommarane i saka.

– Det trengst mykje forbønn for Asia Bibi og for tryggleiken kring dei kristne i Pakistan, seier Paul.

Også generalsekretær Ed Brown i Stefanusalliansen seier seg uroleg.

– Eg er glad for dommen og for at Asia Bibi no er sett fri. Samstundes er eg uroa over kva som kan skje i etterkant. Vi ser allereie at det er demonstrasjonar, og det er frykt for at dei skal utvikle seg slik at det blir retta vald mot kristne. Styresmaktene har også sendt ut meldingar om at religiøse minoritetar må bli beskytta, og kyrkjeleiarar er blitt oppmoda om å be sine tilhengjarar om å halde seg heime desse dagane, seier Brown til KPK. KPK

stein@kpk.no